ឯកឧត្តម​ ជាវ​ តាយ​ ដឹកនាំកិច្ចប្រជុំពិនិត្យវាយតម្លៃកម្រិតកែប្រែរបស់ទណ្ឌិតដែលត្រូវដាក់ស្នេីសុំបន្ធូរបន្ថយទោស​ និងលេីកលែងទោស​ ក្នុងឱកាសបុណ្យពិសាខបូជា​ និងក្នុងឱកាសបុណ្យចូលឆ្នាំខ្មែរ

ខេត្តកំពត៖ នាព្រឹកថ្ងៃអង្គារ​ ០៥កេីត​ ខែផល្គុន​ ឆ្នាំជូត ទោស័ក ព.ស​ ២៥៦៤​ ត្រូវនឹងថ្ងៃទី១៦​ ខែកុម្ភៈ ឆ្នាំ២០២១​ ឯកឧត្តម​ ជាវ​ តាយ​ អភិបាលនៃគណ:អភិបាលខេត្តកំពត​ ដឹកនាំកិច្ចប្រជុំពិនិត្យវាយតម្លៃកម្រិតកែប្រែរបស់ទណ្ឌិតដែលត្រូវដាក់ស្នេីសុំបន្ធូរបន្ថយទោស​ និងលេីកលែងទោស​ ក្នុងឱកាសបុណ្យពិសាខបូជា​ និងក្នុងឱកាសបុណ្យចូលឆ្នាំខ្មែរ​ ដោយមានការអញ្ជេីញចូលរួមពី ឯកឧត្តមអភិបាលរងខេត្ត​ ព្រះរាជអាជ្ញា​ នៃអយ្យការអមសាលាដំបូងខេត្ត​ លោកនាយករងរដ្ឋបាលសាលាខេត្ត​ លោកប្រធានពន្ធនាគារខេត្ត​ លោកស្នងការរងនគរបាលខេត្ត​ លោកមេបញ្ជាការរងកងរាជអាវុធហត្ថខេត្ត​ និងលោកនាយកទីចាត់ការអន្តរវិស័យសាលាខេត្ត សរុប​ ១២​ រូប។ 

មានប្រសាសន៍​សំណេះសំណាលក្នុងឱកាសនោះ​ ឯកឧត្ដម​ ជាវ​ តាយ​ បានលេីកឡេីងថា​ ការប្រជុំពិនិត្យវាយតម្លៃការបន្ធូរបន្ថយ​ និងលេីកលែងទោសនៅពេលនេះ​ គឺត្រូវអនុវត្តទៅតាមច្បាប់កំណត់​ និងជាពិសេសត្រូវពិនិត្យមេីលទៅលេីបទល្មេីសជាក់ស្តែង​ និងអត្តចរិករបស់ទណ្ឌិតដែលមានការកែប្រែចិត្តគំនិតពិតប្រាកដ​ ដែលសាកសមនិងទទួលបានការលេីកលែង​ និងបន្ធូរបន្ថយទោសនៅក្នុងឱកាសបុណ្យពិសាខបូជា​ និងចូលឆ្នាំនាពេលខាងមុខនេះ។