លោកឧត្តមសេនីយ៍ត្រី បោន ប៊ិន ណែនាំដល់កងកម្លាំងពេលអនុវត្តន៍ការងារមិនត្រូវដណ្តើមបទល្មើសគ្នាអ្នកណាទៅបានមុនអ្នកនោះធ្វើដើម្បីប្រជាពលរដ្ឋនិងសង្គម

បន្ទាយមានជ័យ៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានណែនាំដល់កងកម្លាំងពេលអនុវត្តន៍ការងារមិនត្រូវដណ្តើមបទល្មើសគ្នាអ្នកណាទៅបានមុនអ្នកនោះធ្វើដើម្បីប្រជាពលរដ្ឋ និងសង្គម ដែលលើកឡើងក្នុងពិធីសម្ពោធអគាររដ្ឋបាល និងប្រកាសចូលកាន់តំណែងមេបញ្ជាការ និងមេបញ្ជាការរងនៅថ្ងៃទី២៦ ខែធ្នូ ឆ្នាំ២០២២នៅស្រុកមង្គលបូរី។

លោកវរសេនីយ៍ទោ ទួត ឧត្តម ប្រធានមន្ទីរភស្តុភារនៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យបានមានប្រសាន៍ថា៖ អគាររដ្ឋបាលនៃបញ្ជាការដ្ឋានកងរាជអាវុធហត្ថស្រុកមង្គលបូរីដែលត្រូវបានដាក់សម្ពោធឲ្យប្រើប្រាស់ត្រូវបានកសាងនៅថ្ងៃទី២៩ ខែវិច្ឆិកា ឆ្នាំ២០២០ហើយត្រូវបានបញ្ចប់នៅថ្ងៃទី១១ ខែកក្តដា ឆ្នាំ២០២២រយះពេលសាងសង់១ឆ្នាំ៧ខែ១៣ថ្ងៃដែលមានអគាររដ្ឋបាល៦បន្ទប់ អគារស្នាក់នៅឃ្លាំងសម្ភារៈ ផ្ទះបាយ និងបន្ទប់ឃុំខ្លួនបណ្តោះអាសន្ន បន្ទប់ទឹក របងថ្មខ្លោងទ្វារប៉ុស្តិ៍យាមចាក់សាបដែលសរុបថវិកាអស់១៦១.៨៤៨ដុល្លារ(មួយសែនប្រាំមួយម៉ឺនមួយពាន់ប្រាំបីរយសែសិបប្រាំបីដុល្លារ)។

លោកវរសេនីយ៍ត្រី ជួន សុភា នាយការិយាល័យបុគ្គលិកនៃបញ្ជាការដ្ឋានកងរជាអាវុធហត្ថខេត្តបានអានសេចក្តីសម្រេចតែងតាំង១.លោកវរសេនីយ៍ត្រី ចាន់រដ្ឋា ជាមេបញ្ជាការកងរាជអាវុធហត្ថស្រុកមង្គលបូរី ២.លោកអនុសេនីយ៍ឯក រឿង យូរ៉ាន់ ជាមេបញ្ជាការរង ៣.លោកអនុសេនីយ៍ឯក វេន ឆោវ័ន្ត ជាមេបញ្ជាការរង ៣.លោកអនុសេនីយ៍ឯក តាំង ប៊ុនហុក មេបញ្ជាការរង។

លោកឧត្តសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានមានប្រសាសន៍ថា៖ ក្រោយទទួលសមទ្ធិផលហើយត្រូវចូលរួមថែរក្សាអោយបានគង់វង្សឲ្យដូចរបស់ខ្លួនហើយទទួលភារកិច្ចត្រូវសហការគ្នាល្អដើម្បីធ្វើការងារបម្រើប្រជាពលរដ្ឋ និងសង្គមស្របតាមគោលនយោបាយរបស់រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជានាយករដ្ឋមន្ត្រី នៃព្រះរាជាណាចក្រកម្ពុជា ដែលកំពុងដឹកនាំប្រទេសមានសុខសន្តិភាព និងអភិវឌ្ឍន៍រីកចម្រើន។

លោកបានណែនាំដល់កម្លាំងកងរាជអាវុធហត្ថខេត្តបន្ទាយមានជ័យ និងស្រុក/ក្រុងនៅពេលចុះអនុវត្តន៍ការងារមិនត្រូវដណ្តើមបទល្មើសគ្នាអ្នកណាទៅដល់មុនអ្នកនោះធ្វើ ត្រូវចេះសហការគ្នាល្អក្នុងអង្គភាព និងមន្ត្រីស្ថាប័នពាក់ព័ន្ធអាជ្ញាធរមូលដ្ឋានត្រូវធ្វើដើម្បីប្រជាពលរដ្ឋនិងសង្គមអោយមានភូមិ.ឃុំមានសុវត្ថិភាព៕