ខេត្តសៀមរាប៖ នៅថ្ងៃសៅរ៍១៣រោច ខែផល្គុន ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២១ ខែមីនា ឆ្នាំ២០២០ វេលាម៉ោង៨:០០នាទីព្រឹក លោក ទិត ឌីរ៉ា ចៅសង្កាត់គោកចក បានដឹកនាំក្រុមការងារ រៀបចំទិវាបរិស្ថាន ក្នុងគោលបំណងផ្សព្វផ្សាយដល់ប្រជាពលរដ្ឋស្វែងយល់អំពីបញ្ហាសុខភាពជាចម្បង ដោយផ្តោតទៅលើការរស់នៅស្អាត ហូបចុកមានអនាម័យ ដោយមានការចូលរួមពីក្រុមប្រឹក្សាសង្កាត់ មន្ត្រីនគរបាលប៉ុស្តិ៍ និងមកពីតាមបណ្តាភូមិមួយចំនួនដូចជា ភូមិត្រពាំងសេះ ភូមិវាល ភូមិទក្សិណខាងត្បូង ភូមិគោកតាចាន់ ភូមិខ្វៀន ភូមិគោកបេង ភូមិគោកត្នោត ភូមិនគរក្រៅ បុគ្គលិកអង្គការ ព្រមជាមួយនឹងយុវជន ប្រជាពលរដ្ឋ សរុបចំនួន៣៨៨នាក់ ស្រី ១៧០នាក់ ។
ក្នុងនោះដែរលោកចៅសង្កាត់ បានក្រើនរំលឹកដល់បងប្អូនប្រជាពលរដ្ឋអោយយកចិត្តទុកដាក់លើការសំអាតក្នុងបរិវេណជុំវិញផ្ទះ និងតាមដងផ្លូវសាធារណៈជាដើម ជាពិសេស ការវេចខ្ចប់ និងការទុកដាក់សំរាមអោយបានត្រឹមត្រូវ។
ជាងនេះទៅទៀតសប្បុរសជនឈ្មោះ ស្ទៀល ដារ៉េល ភេទ ប្រុស ជនជាតិ អូស្រ្តលី បានមកដាក់គម្រោងជួយទៅលើបរិស្ថាននេះរយៈពេល៥ឆ្នាំ ក្នុងនោះដែរលោកបានឧបត្ថមបង្គន់អនាម័យជូនដល់ប្រជាពលរដ្ឋក្នុងភូមិចំនួន ២៧៦កន្លែង អណ្តូងទឹកចំនួន ៩៧កន្លែងព្រមទាំងមានសាប៊ូ និងថងដាក់សំរាមសម្រាប់ប្រើប្រាស់ជាប្រចាំថ្ងៃ ៕
No comments:
Post a Comment