មន្ទីរវប្បធម៌ និងវិចិត្រសិល្បៈខេត្តព្រះសីហនុ រៀបចំពិធី បិទមហោស្រពសិល្បៈចម្រៀងខ្មែរជាសកលលើកទី៥ក្នុងខេត្ត

ខេត្តព្រះសីហនុ៖ នៅរសៀលថ្ងៃទី០១ ខែកញ្ញា​ ឆ្នាំ២០១៩ម្សិលមិញនេះ មន្ទីរវប្បធម៌ និងវិចិត្រសិល្បៈខេត្តព្រះសីហនុ បានរៀបចំពិធីបិទមហោស្រពសិល្បៈចម្រៀងខ្មែរជាសកលលើកទី៥ ក្នុងខេត្ត។ ពិធីនេះប្រព្រឹត្តទៅក្រោមអធិបតីភាព​ ឯកឧត្ដម​ គួច​ ចំរើន​ អភិបាល​ នៃ​គណ:អភិបាល​ខេត្តព្រះសីហនុ​ ឯកឧត្ដម​ អភិបាលរងខេត្ត​ ព្រមទាំងមានការ ចូលរួមពីលោក លោកស្រី ថ្នាក់ដឹកនាំតាមមន្ទីរ អង្គភាពជុំវិញខេត្តផងដែរ​ ។

មានប្រសាសន៍ក្នុងពិធីបិទនោះដែរ ឯកឧត្ដម​ អភិបាលខេត្ត បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ មន្ទីរវប្បធម៌ និងវិចិត្រសិល្បៈខេត្ត ក្នុងការធ្វើឲ្យកិច្ចដំណើរការប្រព្រឹត្តទៅបានសម្រេចទៅតាមផែនការរបស់ក្រសួង និងទទួលបានបេក្ខជន បេក្ខនារី ជ័យលាភីឆ្នើម ដែលមាន សមត្ថភាពពិតៗ និងបន្តរួមចំណែកក្នុងការបង្កើនស្នាដៃថ្មីក្នុងវិស័យសិល្បៈដើម្បីបំពេញតំរូវការក្នុងវិស័យសង្គមជាតិ ក៏ដូចជាបានចូលរួមកាត់បន្ថយភាពក្រីក្ររបស់ប្រជាជន ស្របតាមគោលនយោបាយ របស់រាជរដ្ឋាភិបាលកម្ពុជា។ ហើយបន្តថែរក្សា និងផ្សព្វផ្សាយ នូវវប្បធម៌របស់ជាតិសាសន៍យើង ដល់ពិភពលោកបានដឹងពីវប្បធម៌ដ៏រឹងមាំទន់ភ្លន់ និងមានប្រវត្តិចំណាស់យូរលង់ជាងគេ ដែលជាអត្តសញ្ញាណជាតិ ជាក់ស្តែងដូចជា ប្រាសាទអង្គរ ដែលជាបណ្តុំនូវប្រវត្តិជាច្រើន ដែលនេះជាមោទនៈភាពរបស់យើងជាខ្មែរ ៕