ឯកឧត្តមបណ្ឌិត សោម ពិសិដ្ឋ អភិបាលខេត្តកែប អញ្ជើញជាអធិបតីក្នុងពិធីប្រកាសតែងតាំង ចូលកាន់មុខតំណែងអភិបាលក្រុងកែប

សាលប្រជុំសាលាក្រុងកែប នៅរសៀលថ្ងៃទី២៦ ខែសីហា ឆ្នាំ២០២២ ឯកឧត្តមបណ្ឌិត សោម ពិសិដ្ឋ អភិបាលខេត្តកែប អញ្ជើញជាអធិបតី ក្នុងពិធីប្រកាសតែងតាំងចូលកាន់មុខតំណែង អភិបាលក្រុងកែប ពិធីនេះក៏មានការអញ្ជើញចូលរួមពីសំណាក ឯកឧត្តម លោកជំទាវ លោក លោកស្រី ថ្នាក់ដឹកនាំខេត្ត មន្ត្រីរាជការ កងកំលាំងទាំងបី និងអាជ្ញាធរមូលដ្ឋានផងដែរ។

យោងតាមអនុក្រឹត្យលេខ ៦៧១អនក្រ.តត របស់រាជរដ្ឋាភិបាល ចុះថ្ងៃទី១៨ ខែសីហា ឆ្នាំ២០២២ សម្រេចតែងតាំង លោក ខេង យ័ន ឋានន្តរស័ក្តិវរមន្ត្រី ថ្នាក់លេខ២ ជាអភិបាលក្រុងកែប។ បន្ទាប់ពីបានស្តាប់របាយការណ៍ លទ្ធផលការងារសំខាន់ៗដែលរដ្ឋបាលក្រុងកែបសម្រេចបាននាពេលកន្លែងមក ដែលរាយការណ៍ដោយ លោកស្រី ទិត សុខា អតីតអភិបាលក្រុងកែប ដែលទើបទទួលភារកិច្ចថ្មី រួចមក ។

មានចំណាប់អារម្មណ៍ និងប្ដេជ្ញាចិត្ត នាឱកាសនោះ លោក ខេង យ័ន អភិបាលក្រុងកែបថ្មី បានសម្តែងនូវក្តី កត្តញ្ញូតាធម៌ដ៏ ជ្រាលជ្រៅ ចំពោះរាជរដ្ឋាភិបាល ដែលបានផ្តល់ទំនុកចិត្ត តែងតាំងជាអភិបាលក្រុងកែប ដើម្បីជាការតបស្នងទៅនឹងទំនុកចិត្តក្នុងការប្រគល់ ភារកិច្ចថ្មីនេះ លោកអភិបាលក្រុងកែបថ្មី បានប្តេជ្ញាចិត្តសម្រួចឆន្ទ: ប្រកបដោយការទទួលខុសត្រូវខ្ពស់ ដើម្បីបំពេញភារកិច្ច បំរើផលប្រយោជន៍ជូនប្រទេសជាតិ និងប្រជាពលរដ្ឋ ស្មោះត្រង់ចំពោះ ជាតិ សាសនា ព្រះមហាក្សត្រ យកចិត្តទុកដាក់ ចូលរួមអនុវត្តន៍កម្មវិធីនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឲ្យទទួលបានលទ្ធផលល្អប្រសើរ ថែមទៀត។

មានមតីសំណេះសំណាល និងផ្តាំផ្ញើរ នាឱកានោះ ឯកឧត្តមបណ្ឌិត សោម ពិសិដ្ឋ អភិបាល នៃគណអភិបាលខេត្តកែប មានប្រសាសន៍ថា៖ សមិទ្ធផលនានាក្នុងខេត្ត ដែលលោកស្រី ទិត សុខា អតីតអភិបាលក្រុងកែប បានរាយការណ៍ នាពេលនេះ គឺកើតឡើងពីការខិតខំប្រឹងប្រែង រួមគ្នារវាងថ្នាក់ដឹកនាំខេត្ត ក្រុង ស្រុក មន្ទីរអង្គភាពជំនាញ និងអាជ្ញាធរមូលដ្ឋាន។ ឯកឧត្តមបណ្ឌិត បានបន្ថែមទៀតថា កិច្ចការអភិវឌ្ឍន៍ទាំងអស់ គឺមានគោលបំណង បម្រើផលប្រយោជន៍ទូទៅ បង្កើតការងារ និងបង្កើនប្រាក់ចំណូលជូនប្រជាពលរដ្ឋស្របតាមយុទ្ធសាស្រ្តកាត់បន្ថយភាពក្រីក្រ របស់រាជរដ្ឋាភិបាល។

ជាមួយគ្នានេះ ឯកឧត្តមបណ្ឌិត ក៏បានកោតសរសើរ និងវាយតម្លៃខ្ពស់ ចំពោះសមិទ្ធផល ដែលរដ្ឋបាលក្រុងកែប សម្រេចបាននាពេលកន្លងមក ដែលជាការរួមចំណែក យ៉ាងសំខាន់ក្នុងការអភិវឌ្ឍប្រទេសជាតិ ពង្រឹងសន្តិភាព ស្ថិរភាពនយោបាយ ស្ថិរភាពសង្គម និងធានាបាននូវ និរន្តរភាព ប្រក្រតីភាព នៃស្ថាប័នជាតិ និងរដ្ឋបាលសាធារណៈ។ ឯកឧត្តម បានផ្តាំផ្ញើដល់ លោកអភិបាលក្រុងកែបដែលទទួលតំណែងថ្មី ត្រូវបន្តរក្សាសាមគ្គីភាព ឯកភាពផ្ទៃក្នុង ឲ្យបានល្អ ពង្រឹងការទំនាក់ទំនងល្អជាមួយ រដ្ឋបាលសង្កាត់ មេភូមិ សំដៅលើក កំពស់ការផ្តល់សេវាសាធារណៈ សេវារដ្ឋបាល ជូនប្រជាពលរដ្ឋឲ្យកាន់តែមានគុណភាព តម្លាភាព និងប្រសិទ្ធិភាព។

ឆ្លៀតក្នុងឱកាសនោះ ឯកឧត្តម អភិបាលខេត្ត ក៏ផ្ដល់អនុសាសន៍មួយចំនួន ជូនដល់ រដ្ឋបាលក្រុងកែប សង្កាត់ កងកម្លាំងអាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់លើការងារសំខាន់ដូចខាងក្រោម៖

-ត្រូវពង្រឹងគ្រប់គ្រងសភាពការណ៍តាមមូលដ្ឋាន ដើម្បីដាក់ចេញនូវវិធានការនានាសំដៅទប់ស្កាត់ នៅរាល់សកម្មភាពប៉ុនប៉ងបង្កអោយមានភាពចលាចលវឹកវរ និងអសន្តិសុខសង្គម។

-ត្រូវយកចិត្តទុកដាក់អប់រំណែនាំ និងបកស្រាយប៉ភ្លឺជូនប្រជាពលរដ្ឋអោយបានទាន់ពេលវេលា នូវរាល់សកម្មភាពបំផុសបំផុល ការផ្សព្វផ្សាយព័ត៌មានមិនពិត និងសកម្មភាពផ្សេងៗដែលមានចរិតអុចអាល បង្កអោយមានហឹង្សាក្នុងសង្គម និងខិតខំអប់រំបំផុសប្រជាពលរដ្ឋអោយចូលរួមគោរពច្បាប់ ចូលរួមការពារផលប្រយោជន៍សាធារណៈ និងចៀសវាងសកម្មភាពទាំងឡាយណាដែលផ្ទុយពីច្បាប់។

-ត្រូវយកចិត្តទុកដាក់គ្រប់គ្រងដោះស្រាយជម្លោះ និងការទាមទារតវ៉ានានាប្រកបដោយសន្តិវិធីផ្អែកលើគោលការណ៍ច្បាប់ យុត្តិធម៌ និងចៀសវាងការប្រើអំពើហឹង្សាតាមគ្រប់រូបភាព។

-ត្រូវជំរុញអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ទាំង៧ចំណុចរបស់រាជរដ្ឋាភិបាល។

ជាពិសេសត្រូវ ខិតខំអប់រំផ្សព្វផ្សាយ ដល់គ្រប់ស្រទាប់ប្រជាពលរដ្ឋ អោយទៅទទួលវ៉ាក់សាំការពារជំងឺកូវីដ-១៩ ដើម្បីធានាសុខុមាលភាពប្រជាពលរដ្ឋ និងរួមគ្នាទប់ស្កាត់អោយបាន នូវរលកថ្មីនៃការឆ្លងរាលដាលជំងឺកូវីដ១៩ ៕