អ៊ុយក្រែនអរគុណដល់អង់គ្លេស បន្ទាប់ពីអង់គ្លេសប្រកាសផ្តល់សព្វាវុធរ៉ុក្កែតបាញ់ចម្ងាយដល់ខ្លួន

ទីក្រុងគៀវ៖ ប្រធានាធិបតីអ៊ុយក្រែនលោក Volodymyr Zelenskiy ថ្លែងអំណរគុណដល់ប្រទេសអង់គ្លេសដែលយល់សុខទុក្ខដឹងពីតម្រូវការរបស់ខ្លួន ក្រោយអង់គ្លេសប្រកាសផ្តល់សព្វាវុធដល់អ៊ុយក្រែន។

បើតាមចុះផ្សាយដោយ Reuters នៅថ្ងៃទី៧ ខែមិថុនា ឆ្នាំ២០២២នេះបានឲ្យដឹងថា ការផ្តល់សព្វាវុធពីអង់គ្លេសនេះ គឺដោយមានការសម្របសម្រួលពីសហរដ្ឋអាមេរិក ដើម្បីប្រយុទ្ធប្រឆាំងនឹងសង្រ្គាមជាមួយរុស្ស៊ី។

នៅក្នុងសុន្ទរកថាទាំងយប់មួយរបស់លោក Zelenskiy បាននិយាយថា “ខ្ញុំដឹងគុណចំពោះនាយករដ្ឋមន្រ្តីអង់គ្លេសលោក Boris Johnson សម្រាប់ការជ្រួលជ្រាបពេញលេញនៃតម្រូវការរបស់អ៊ុយក្រែននាពេលនេះ ព្រោះថាយើងត្រូវការសព្វាវុធយ៉ាងពិតប្រាកដ ដើម្បីការពារអាយុជីវិតប្រជាជនរបស់យើង” ។

គួបញ្ជាក់ថា ការផ្គត់ផ្គង់អាវុធនេះជាប្រភេទ ប្រព័ន្ធរ៉ុក្កែតបាញ់ចម្ងាយឆ្ងាយរហូតដល់ ៨០គីឡូម៉ែត្រ និងបាញ់បានច្រើនគ្រាប់។

កាលពីថ្ងៃច័ន្ទដើមសប្តាហ៍នេះ កងទ័ពអ៊ុយក្រែន និងរុស្ស៊ីបានប្រយុទ្ធគ្នាតាមដងផ្លូវ ដើម្បីគ្រប់គ្រងទីក្រុងឧស្សាហកម្ម Sievierodonetsk ក្នុងសមរភូមិដ៏សំខាន់នៃការវាយលុករបស់វិមានក្រឹមឡាំង នៅតំបន់ Donbas ភាគខាងកើតនៃប្រទេសអ៊ុយក្រែន៕