ឯកឧត្តម អ៊ុំ រាត្រី អភិបាលខេត្តបន្ទាយមានជ័យ អញ្ជើញចុះពិនិត្យការស្ថាបនាស្ពាន និងលូប្រអប់ ដើម្បីឆ្លើយតបតម្រូវការប្រើប្រាស់ប្រជាពលរដ្ឋ ក្នុងស្រុកមង្គលបូរី

នាថ្ងៃទី២៥ ខែឧសភា ឆ្នាំ២០២២ ឯកឧត្តម អ៊ុំ រាត្រី អភិបាល ​នៃគណៈអភិបាលខេត្តបន្ទាយមានជ័យ បានអញ្ជើញចុះពិនិត្យមើលស្ពានឈើលើកំណាត់ផ្លូវទីតាំងនៅក្រោយវិទ្យាល័យមង្គលបូរី ឃុំឬស្សីក្រោក និងលូឆ្លងអូរធំ ភូមិអូរធំ ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ដើម្បីរៀបចំការស្ថាបនាជាស្ពាន និងលូប្រអប់បេតុង ដើម្បីសម្រួលដល់ការធ្វើដំណើរឆ្លងកាត់ និងរំដោះទឹកជំនន់ នារដូវវស្សា។

នាឱកាសនោះ ឯកឧត្តម អភិបាលខេត្ត បានគូសបញ្ជាក់ថា ដើម្បីដោះស្រាយដល់ការលំបាករបស់ប្រជាពលរដ្ឋ ក្នុងការធ្វើដំណើរឆ្លងកាត់ស្ពានឈើបណ្តោះអាសន្ននេះ និងដើម្បីធានាដល់ការកក់ស្ទះជន់លិចភូមិឋាន ផ្លូវថ្នល់ ដូចឆ្នាំកន្លងមកនេះ ពេលមានទឹកជំនន់កើតមានឡើង។

ឯកឧត្តម ក៏បានជំរុញដល់មន្ត្រីពាក់ព័ន្ធ ត្រូវពន្លឿនការស្ថាបនា ដើម្បីបំពេញតម្រូវការប្រើប្រាស់ចំពោះមុខរបស់ប្រជាពលរដ្ឋ នារដូវវស្សាខាងមុខនេះ។

សូមបញ្ជាក់ថា រដ្ឋបាលខេត្តបន្ទាយមានជ័យ បានលើកគម្រោងស្ថាបនាជាលូប្រអប់ជ្រុង និងជាស្ពានបេតុងឆ្លងដ៍រឹងមាំ សម្រាប់ប្រជាពលរដ្ឋឆ្លងកាត់ ព្រមទាំងដឹកជញ្ជូនទំនិញផ្សេងៗជាដើមផងដែរ៕