(ខេត្តរតនគិរី)៖ កម្លាំងមន្ត្រីឧទ្យានុរក្ស ស្នាក់ការឧទ្យានជាតិវើនសៃ-សៀមប៉ាង បានចុះល្បាត ពួនស្ទាក់បង្ក្រាបបានបទល្មើសសត្វព្រៃមួយ ដោយជួបប្រទះជនសង្ស័យមួយក្រុម កំពុងបោះជំរំតង់ មានគ្នាចំនួន០៤នាក់ ប៉ុន្តែពេលកម្លាំងមន្ត្រីឧទ្យានុរក្ស ចូលទៅដល់ ពួកគេដឹងខ្លួនទាន់ ក៏រត់គេចខ្លួនក្នុងព្រៃបាត់ ទុកសម្ភារនិងម៉ូតូចោល ។
ប្រភពពីប្រធានមន្ទីរបរិស្ថានខេត្តរតនគិរី បានអោយដឹងថា ក្រុមជនល្មើសត្រៀមសម្ភារជាច្រើន ចូលទៅធ្វើសកម្មភាព ចាំប្រម៉ាញ់ចាប់សត្វព្រៃ ក្នុងតំបន់ឧទ្យានជាតិ (វើនសៃ-សៀមប៉ាង) រួចហើយដឹកជញ្ជូនចេញលក់ឲ្យក្រុមឈ្មួញ ។
បច្ចុប្បន្ន មន្ត្រីឧទ្យានុរក្សរឹបអូសយកបានម៉ូតូ ចំនួន០២គ្រឿង, សត្វរញី(រស់) ចំនួន០១ក្បាល, ម៉ងចាប់សត្វសំពោធ ចំនួន០២ត្បូងប្រវែងប្រមាណ១០០ម៉ែត្រ, អង្រឹងចំនួន០៤, គូមឆ្លុះសត្វ ចំនួន០២, កាបូបស្ពាយ(កព្ចាប់ចូលព្រៃ)ចំនួន០២, ញ៉ែងដាក់សត្វ ចំនួន០២, កាំបិតចំនួន០១, ការ៉ុងគ្រឿងហូបចុកចានឆ្នាំង០១ចំនួន និងស្បែកជើងចំនួន០២គូ ។
ដោយឡែក មន្ត្រីបរិស្ថានខេត្តបាត់ដំបង បានអោយដឹងនៅថ្ងៃទៅ០៩ កក្កដានេះថា កម្លាំងមន្ត្រីឧទ្យានុរក្សតំបន់បេតិកភណ្ឌធម្មជាតិ ចុះល្បាតក្នុងភូមិសាស្ត្រស្រុកភ្នំព្រឹក បានរកឃើញអន្ទាក់ខ្សែលួស រាយស្ទាក់ដាក់យកសត្វព្រៃ មានប្រវែង៤០០ម៉ែត្រ និងខ្សែលីឡុង ចងបង្គោលប្រវែង៤០០ម៉ែត្រ ផងដែរ ។ វត្ថុតាងទាំងអស់នោះ ត្រូវយកមករក្សាទុកនៅទីស្នាក់ការល្អាងភ្នំប្រាំពីរ។
បើតាមរបាយការណ៍ អង្គការសម្ព័ន្ធមិត្ដសត្វព្រៃ Wildlife Alliance Cambodia បង្ហាញថា ក្នុងរយៈពេល ៥ខែដំបូង ក្នុងឆ្នាំ២០២១នេះ អង្គការសម្ព័ន្ធមិត្តសត្វព្រៃ និងក្រុមមន្ត្រីឧទ្យានុរក្សរបស់ក្រសួងបរិស្ថាន បានដកអន្ទាក់ចេញចំនួនជាង ១០,០០០ អន្ទាក់ ៕
No comments:
Post a Comment