កំពង់ធំ ÷ រហូតមកដល់ពេលនេះលោក ស៊ុន ចាន់ថុល រដ្ឋមន្ត្រីក្រសួងសាធារណការនិងលោក សេង ឈួន មេជញ្ជីងថ្លឹងរថយន្តទូទាំងប្រទេសបែរជាធ្វើមិនដឹងមិនឮទៅវិញ។
ថ្មីៗនេះអំពើពុករលួយរបស់លោក ផន ម៉ៅ ប្រធានស្ថានីយ៍ជញ្ជីងថ្លឹងរថយន្តប្រាសាទ ផ្លូវជាតិលេខ៦ ស្រុកសន្ទុក ត្រូវបានមន្ត្រីតុលាការនិងសមត្ថកិច្ច ពាក់ព័ន្ធបើកកកាយជាសាធារណៈមិនអាចបិទបាំងតទៅ ទៀតបានឡើយ។
បន្ទាប់មកក្រុមអ្នកបើកបរ រថយន្តដឹកទំនិញបានធ្វើការតវ៉ាបិទផ្លូវជាតិលេខ៦មុខស្ថានីយ៍ជញ្ជីងថ្លឹងរថយន្តប្រាសាទ អស់រយៈពេលរាប់ម៉ោងដោយសារខឹងសម្បានឹងលោក ផន ម៉ៅ ប្រធានស្ថានីយ៍ជញ្ជីងថ្លឹង រថយន្តប្រាសាទ គាបយកលុយពីពួកគេតាមអំពើចិត្ត។
ប៉ុន្តែរហូតមកដល់ពេលនេះលោក ស៊ុន ចាន់ថុល រដ្ឋមន្ត្រីក្រសួងសាធារណការ និងលោក សេង ឈួន មេជញ្ជីងថ្លឹងរថយន្តទូទាំងប្រទេស បែរជាធ្វើមិនដឹងមិនឮអ្វីទាំងអស់។
មន្ត្រីរាជការនៅក្នុង មន្ទីរសាធារណការខេត្តកំពង់ធំបានឲ្យដឹងថារហូតមកដល់ពេលនេះលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនទាន់ចាត់វិធានការទប់ស្កាត់អំពើពុករលួយរបស់លោក ជូ កុល្លា ប្រធានមន្ទីរសាធារណការខេត្តកំពង់ធំ និងបក្ខពួកនោះទេ។
ផ្ទុយទៅវិញលោក ស៊ុន ចាន់ថុល បណ្តោយឲ្យលោក ជូ កុល្លា ប្រធានមន្ទីរសាធារណការខេត្តកំពង់ធំ និងលោក ផន ម៉ៅ ប្រធានស្ថានីយ៍ ជញ្ជីងថ្លឹងរថយន្តប្រាសាទ ផ្លូវជាតិលេខ៦ ស្រុកសន្ទុក បន្តប្រព្រឹត្តអំពើពុករលួយយ៉ាងគឃ្លើន។
សូម្បីតែលោក សេង ឈួន ប្រធានស្ថានីយ៍ជញ្ជីងថ្លឹងរថយន្តទូទាំងប្រទេស ក៏បណ្តោយឲ្យលោក ផន ម៉ៅ ប្រធានស្ថានីយ៍ជញ្ជីងថ្លឹងរថយន្តប្រាសាទ ផ្លូវជាតិលេខ៦ ស្រុកសន្ទុក ធ្វើអ្វីៗតាមអំពើចិត្តរបស់ខ្លួនដែរ។
ប្រភពស្និទ្ធនឹងលោក ជូ កុល្លា ប្រធានមន្ទីរសាធារណការខេត្តកំពង់ធំ បានឲ្យដឹងថា ដោយសារអាងមានឪពុក ក្មេកជាមន្ត្រីយោធាជាន់ខ្ពស់នៅក្រសួង ការពារជាតិជាបង្អែកដ៏រឹងមាំទើបលោក ជូ កុល្លា ហ៊ានធ្វើអ្វីៗតាមអំពើចិត្តរបស់ខ្លួន។
សូម្បីតែលោក សុខ លូ អភិបាលខេត្តកំពង់ធំ ក៏លោក ជូ កុល្លា ហ៊ានផ្គើនដាក់ដែរព្រោះអាងឥទ្ធិពលអំណាចរបស់ឪពុកក្មេកខ្លួនហើយបច្ចុប្បន្នមន្ទីរសាធារណការខេត្តកំពង់ធំស្ទើរតែក្លាយ ទៅជាក្រុមហ៊ុនរកស៊ីផ្តាច់មុខរបស់លោក ជូ កុល្លា និងបក្ខពួកទៅហើយ។
បញ្ហានេះហើយជារឿងដែលលោក ស៊ុន ចាន់ថុល រដ្ឋមន្ត្រីក្រសួងសាធារណការ គួរពិនិត្យឡើងវិញជាបន្ទាន់ ព្រោះអំពើពុករលួយច្រើនបែប ច្រើនយ៉ាងរបស់លោក ជូ កុល្លា និងលោក ផន ម៉ៅ ប្រធានស្ថានីយ៍ជញ្ជីងថ្លឹង រថយន្តប្រាសាទ ផ្លូវជាតិលេខ៦ ស្រុកសន្ទុក ត្រូវបានលាតត្រដាង ជាបន្តបន្ទាប់។
No comments:
Post a Comment