លោក ឈួរ ច័ន្ទឌឿន៖ កត្តាសុខសន្តិភាពទើបមានឱកាសបានចូលរួមក្នុងវិស័យពុទ្ធចក្រ និងអាណាចក្រឱ្យរីកចម្រើន

 ខេត្តកំពង់ឆ្នាំង៖ នៅថ្ងៃទី០២ ខែធ្នូ ឆ្នាំ២០១៩ លោក ឈួរ ច័ន្ទឌឿន អភិបាលខេត្តកំពង់ឆ្នាំង និងលោកស្រី​រួមនិងថ្នាក់នាំអង្គភាពជុំវិញខេត្ត អាជ្ញាធរដែនដី បាននាំយកស៊ីម៉ង់ត៍ចំនួន១០តោន និង​បច្ច័យ​មួយ​ចំនួន​យកទៅប្រគេនដល់ព្រះចៅអធិការវត្តភ្នំយោង ស្ថិតក្នងសង្កាត់កំពង់ឆ្នាំង ក្រុងកំពង់ឆ្នាំង​ ខេត្តកំពង់ឆ្នាំង ។

មានប្រសាសន៍សំណេះសំណាលក្នុងឱកាសនោះលោក ឈួរ ច័ន្ទឌឿន ក៏បានពាំនាំនូវប្រសាសន៍ផ្តាំផ្ញើសាកសួរ   សុខទុក្ខពីលោកនាយករដ្ឋមន្រ្តី ​ហ៊ុន សែន ដល់ប្រជាពលរដ្ឋដែលកន្លងមកលោកតែងតែគិតគូរពីសុខទុក្ខ ប្រជាពលរដ្ឋគ្រប់ពេលវេលា និងគ្រប់ទីកន្លែងដោយមិនប្រកាន់សាសនា ពូជសាសន៍ បក្ខពួក និងនិន្នាការនយោបាយឡើយ។

លោក​ បានមានប្រសាសន៍បន្តថា​ ប្រទេសជាតិក្រោមការដឹកនាំរបស់លោក ហ៊ុន សែន ជានាយករដ្ឋមន្រ្តីធានាបានសុខសន្តិភាព ស្ថិរភាពពេញលេញជូនប្រជាពលរដ្ឋ និងអភិវឌ្ឍន៍រីកចំរើនលើគ្រប់វិស័យទាំងផ្នែកពុទ្ធចក្រ និងអាណាចក្រ។

លោក ឈួរ ច័ន្ទឌឿន ក៏បានផ្តាំផ្ញើដល់ប្រជាពលរដ្ឋដែលបានចូលរួមទាំងអស់អោយខិតខំថែទាំ សុខភាព បង្កើនមុខរបរប្រចាំថ្ងៃអប់រំកូនចៅអោយខិតខំរៀនសូត្រ ចូលរួមគោរពច្បាប់ចរាចរណ៍ និងចូលរួមគោរពច្បាប់ធម្មនុញ្ញនៃព្រះរាជាណាចក្រកម្ពុជាបានកំណត់។ ជាពិសេសរួមគ្នាថែរក្សាសុខសន្តិភាព និងប្រឆាំងដាច់ខាតចំពោះជនអគតិដែលចង់បំផ្លាញសន្តិភាពនៅកម្ពុជា៕