កិច្ចប្រជុំស្តីពីការត្រួតពិនិត្យ ណែនាំពាក់ព័ន្ធទៅនឹងការគ្រប់គ្រងបច្ចេកទេស សុវត្ថិភាពនៅតាមស្ថានីយប្រេងឥន្ធនៈគ្រប់ប្រភេទ

កោះកុង៖ នៅថ្ងៃទី២៦ ខែឧសភា ឆ្នាំ២០២០ លោក សុខ សុទ្ធី អភិបាលរង នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំ ស្តីពីការត្រួតពិនិត្យ ណែនាំពាក់ព័ន្ធទៅនឹងការគ្រប់គ្រងបច្ចេកទេស សុវត្ថិភាព ស្ថានីយប្រេងឥន្ធនៈ ស្ថានីយឧស្ម័ន និងស្ថានីយរួមប្រេង និងឧស្ម័នឥន្ធនៈ។ លោកអភិបាលរងខេត្ត បានលើកឡើងថា ដោយមានការណែនាំពីក្រសួងរ៉ែ និងថាមពល រួមជាមួយប្រសាសន៍ណែនាំពីលោកស្រីអភិបាលខេត្ត ក្នុងការធ្វើឲ្យមានសុវត្ថិភាពស្ថានីយប្រេងឥន្ទនៈ។

រដ្ឋបាលខេត្ត រៀបចំកិច្ចប្រជុំដើម្បីត្រៀមចុះត្រួតពិនិត្យស្ថានីយប្រេងឥន្ធនៈ ស្ថានីយឧស្ម័ន និងស្ថានីយរួម ប្រេងនិងឧស្ម័នឥន្ធនៈ នៅក្នុងក្រុងខេមរភូមិន្ទ ខេត្តកោះកុង។ ការចុះត្រួតពិនិត្យនេះ នឹងមានការចូលរួមពីតំណាងរដ្ឋបាលខេត្ត រដ្ឋបាលក្រុង មន្ទីររ៉ែនិងថាមពល មន្ទីររៀបចំដែនដី នគរូបនីយកម្ម សំណង់ និងសុរិយោដី មន្ទីរបរិស្ថាន នគរបាល និងកងរាជអាវុធហត្ថ។

ចំពោះចំណាត់ថ្នាក់ហានិភ័យសម្រាប់ស្ថានីយប្រេងឥន្ទនៈស្ថានីយឧស្ម័ន និងស្ថានីយរួម ប្រេងនិងឧស្ម័នឥន្ធនៈ ដូចជា៖
១. ពណ៌ខៀវ = ស្ថានីយអាចដំណើរការបាន
២. ពណ៌លឿង= ស្ថានីយមានកំរិតហានិភ័យទាបអាចធ្វើការកែសម្រួល និងដំណើរការបាន
៣. ពណ៌ស្វាយ = មានកំរិតហានិភ័យមធ្យម អាចធ្វើការកែសម្រួល និងដំណើរការបាន
៤. ពណ៌ក្រហម= មានកំរិតហានិភ័យខ្ពស់ មិនអាចដំណើរការបានឡើយ។ ការចុះត្រួតពិនិត្យលើកនេះ គឺចុះត្រួតពិនិត្យតែស្ថានីយមានកំរិតពណ៌ស្វាយតែប៉ុណ្ណោះ៕