ខេត្តស្វាយរៀង៖ នាព្រឹកថ្ងៃព្រហស្បតិ៍ ទី១៩ ខែវិច្ឆិកា ឆ្នាំ២០២០នេះ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងពិធីចែកគ្រាប់ពូជដំណាំ ដែលជាអំណោយដ៏ថ្លៃថ្លារបស់សម្ដេចតេជោនាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់ជូនបងប្អូនប្រជាពលរដ្ឋដែលរងគ្រោះដោយជំនន់ទឹកភ្លៀង ចំនួន ៧០គ្រួសារ មកពីបណ្ដាសង្កាត់នានា ក្រុងស្វាយរៀង។
ពិធីនេះក៏មានការអញ្ជើញចូលរួមពីលោកប្រធានមន្ទីកសិកម្ម រុក្ខាប្រមាញ់ និងនេសាទខេត្ត លោកប្រធានសាខាពន្ធដារខេត្ត លោកនាយកសាខាកាកបាទក្រហមកម្ពុជាខេត្ត ក្រុមប្រឹក្សាក្រុង គណៈអភិបាលក្រុងស្វាយរៀង អាជ្ញាធរមូលដ្ឋានពាក់ព័ន្ធ និងបងប្អូនប្រជាពលរដ្ឋដែលអញ្ជើញមកទទួលគ្រាប់ពូជដំណាំនៅថ្ងៃនេះ ។
មានប្រសាសន៍ទៅកាន់ពិធីនេះឯកឧត្តមអភិបាលខេត្តបានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ដែលជានិច្ចកាលសម្តេចទាំងទ្វេ តែងតែយកចិត្តទុកដាក់គ្រប់ពេលវេលានូវសុខទុក្ខរបស់ប្រជាពលរដ្ឋគ្រប់ទីកន្លែង និងណែនាំក្រើនរំលឹកជាប្រចាំឲ្យអាជ្ញាធរដែនដីគ្រប់លំដាប់ថ្នាក់យកចិត្តទុកដាក់ដោះស្រាយនូវបញ្ហាប្រឈមរបស់ប្រជាពលរដ្ឋដែលរងគ្រោះដោយជំនន់ទឹកភ្លៀង តាមរយៈការជួយគាំទ្រដល់ការដាំដុះឡើងវិញនៅក្រោយទឹកស្រក ។ ដូច្នេះហើយទើបនៅពេលកន្លងមក ក៏ដូចជាពេលនេះ សម្ដេចបានផ្ដល់ជូនពូជស្រូវ ដែលយើងបានចែកជូនបងប្អូនប្រជាពលរដ្ឋរួចហើយ និងគ្រាប់ពូជដំណាំដែលយើងកំពុងដំណើរការចែកជូនបងប្អូនប្រជាពលរដ្ឋនៅក្នុងក្រុងស្វាយរៀង និងស្រុកស្វាយជ្រំ ក្នុងពេលដំណាលគ្នានេះ និងបន្តចែកជូនបងប្អូនប្រជាពលរដ្ឋនៅស្រុករមាសហែក នៅថ្ងៃស្អែក ដែលទាំងអស់នេះគឺជាការគិតគូរយកចិត្តទុកដាក់ដ៏ខ្ពង់ខ្ពស់របស់សម្ដេចទាំងពីរចំពោះតម្រូវការជាក់ស្ដែងរបស់ប្រជាពលរដ្ឋ ដែលឯកឧត្ដមជំនួសមុខឲ្យបងប្អូនប្រជាពលរដ្ឋ បានសម្ដែងនូវការអរគុណយ៉ាងជ្រាលជ្រៅបំផុតជូនចំពោះសម្តេចតេជោ និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន។
ជាមួយនេះ ក្នុងនាមរដ្ឋបាលខេត្ត ឯកឧត្តមអភិបាលខេត្ត បានសម្ដែងនូវការសោកស្តាយចំពោះការបាត់បង់ និងខូចខាតផលដំណាំ កសិផល របស់បងប្អូនប្រជាពលរដ្ឋដែលបណ្ដាលមកពីជំនន់ទឹកភ្លៀងនាពេលកន្លងមក ដែលនៅក្នុងខេត្តស្វាយរៀងរបស់យើងបានប៉ះពាល់ ៥ក្រុង ស្រុក ក្នុងនោះក្រុងស្វាយរៀងក្រៅប៉ះពាល់នូវហេដ្ឋារចនាសម្ព័ន្ធ និងលំនៅដ្ឋានមួយចំនួនរបស់ប្រជាពលរដ្ឋ ក៏មានការខូចខាតដំណាំស្រូវ និងដំណាំរួមផ្សំផងដែរ ។
ឯកឧត្ដមអភិបាលក៏បានសំណូមពរឲ្យបងប្អូនប្រជាពលរដ្ឋ ត្រូវយកគ្រាប់ពូជដំណាំដែលចែកជូននៅថ្ងៃនេះ ទៅប្រើប្រាស់បង្កបង្កើនផលឲ្យចំទិសដៅ ដើម្បីជាទុនក្នុងរបរកសិកម្មតទៅមុខទៀត ហើយមន្ទីរជំនាញ អាជ្ញាធរមូលដ្ឋានត្រូវតាមដាន និងជួយគាំទ្រផ្នែកបច្ចេកដល់បងប្អូនក្នុងការដាំដុះពូជបន្លែនេះ ព្រមទាំងបានអំពាវនាវដល់ប្រជាពលរដ្ឋទាំងអស់បន្តការប្រុងប្រយ័ត្ន និងចូលរួមទាំងអស់គ្នាដើម្បីការពារខ្លួន ព្រមទាំងក្រុមគ្រួសារ និងសហគមន៍ ពីជំងឺកូវីដ-១៩ ព្រោះមកដល់ពេលនេះជំងឺនេះនៅបន្តរីករាលដាលយ៉ាងខ្លាំង និងពុំទាន់មានវ៉ាក់សាំងការពារនៅឡើយទេ ។ ក្នុងនោះត្រូវរួមគ្នាគោរពច្បាប់ចរាចរណ៍ ចូលរួមពង្រឹងនូវភូមិឃុំមានសុវត្ថិភាព និងចៀសឲ្យឆ្ងាយពីគ្រឿងញៀនគ្រប់ប្រភេទ ។
អំណោយសម្ដេចតេជោ និងសម្ដេចកិត្តិព្រឹទ្ធបណ្ឌិត ដែលផ្ដល់ជូនប្រជាពលរដ្ឋ ទាំង ៧០គ្រួសារ នាឱកាសនេះ ក្នុងមួយគ្រួសារ ទទួលបាន គ្រាប់ពូជដំណាំ ១កញ្ចប់ មាន ៤មុខ (ពោត ត្រកួន ល្ពៅ និងត្រប់) ថ្នាំសម្លាប់មេរោគក្នុងទ្រុងសត្វ ១ដប និងថវិកាមួយចំនួន៕
No comments:
Post a Comment